Un spaçadôr che al rive di Pistoie al à cirût di vendi droghe ae persone sbaliade, un carabinîr in borghês, e al è lât dret in preson.
Il fat al è sucedût a Çopule vie pe gnot tra vinars ai 20 e sabide ai 22 di Setembar, cuant che i carabinîrs di Vile di Flum e di Pordenon, judâts dai coleghis dal Nucli ispetorât dal lavôr di Pordenon, dai Nas di Udin e di doi agjents de Polizie locâl di Daçan cul cjan antidroghe “Nico”.
Dilunc dai controi, il zovin di 27 agns, za cognossût aes fuarcis dal ordin, al è stât blocât dentri dal Hollywood Disco bar di Çopule dopo vê cirût di vendi marihuana e MDMA a un agjent. Intor al spaçadôr i carabinîrs i àn cjatât 13 grams di marihuana e plui di 100 pirulis di ecstasy. La zornade dopo, l’arest al è stât convalidât dal tribunâl di Pordenon.
La discoteche e à invezit cjapât une multe di plui o mancul 10 mil euros par violazions di leç sul lavôr e su la conservazion de mangjadorie. (a.d.g.) – 24.09.2024
