A tornin, compagn di ogni an la prime sabide di Otubar, lis Zornadis dal Cine Mut di Pordenon, un apontament di no pierdi pai apassionâts di cine. Dai 5 ai 12 di Otubar, il Teatri “Verdi” al devente il lûc là che si rinove la maravee de vision di cines dai prins decenis dal secul passât, in copiis restauradis che a vegnin di archivis e cinetechis di dut il mont, acompagnadis di un coment musicâl fat dal vîf di pianiscj e grups, e di une orchestre intai avigniments di viertidure e di sierade. In graciis de colaborazion cun MYmovies, ancje chest an lis Zornadis a saran ancje in streaming, in rêt. I avigniments principâi, che a vierzin e a sierin lis Zornadis, a son tal segn dal western: John Ford al è il regjist di “3 Bad Men” (I trê birbants), dal 1926, il so ultin western mut, in program sabide ai 5 di Otubar tal “Verdi”, intant che par sierâ al è stât sielt “The Winning of Barbare Worth” (Savalons ardints, 1926), cun Gary Cooper intal so prin rûl impuartant. (A.I.) – 25.09.2024
Foto di Wisconsin Center for Film and Theater
