Om al reste blocât cu la sô auto dentri dal torint Maline

Un om di 47 agns, di Colorêt di Montalban, al è restât blocât dentri de sô auto intant che al cirive di passâ pal vât sul torint Maline, vuê di matine in localitât Casali Malina tal Comun di Premariâs.

Lis fuartis ploiis di îr a vevin blocât la strade, tant che e jere stade metude la proibizion di doprâle, ma il vuidadôr al à decidût dut câs di passâ sul vât cu la sô Ford Focus che e je restade di colp blocade te aghe che e à tacât a lâ su’.

L’om al à clamât daurman par vê jutori e sul puest a son rivâts in pôcs minûts i pompîrs che a àn tirât fûr de aghe la auto intant che l’om al vignive tirât su’ cul elicotar dal elisocors regjonâl. (a.d.g.) – 25.09.2024