‘Pordenonelegge’ cumò al va fûr de citât

Daspò dal grant sucès de vincjesime cuinte edizion, ‘pordenonelegge’ e tache dal prin di Otubar une schirie di incuintris sul teritori cun grancj nons de leterature taliane e autôrs di saçs. A saran trê dome lis novitâts di scuvierzi cui lôr autôrs, fint ai 27 di Novembar, pal cartelon di “Fuoricittà_Autunno”, par cure dal diretôr artistic de rassegne ‘plui grande’, Gian Mario Villalta. Si tache il prin di Otubar tal Auditorium di S. Vît dal Tiliment cun Franco Berrino, miedi e espert di prevenzion de salût, in dialic cun Gabriele Giuga par fevelâ dal so gnûf libri e de maniere juste par fermâ il timp (e cirî di deventâ mancul vecjos) cul benstâ e mangjant dome ce che al covente. Il secont apontament dal mês al è joibe ai 10 tal teatri “Pileo” di Prate cuntun zovin autôr, Riccardo Bertoldi. Joibe ai 17, tal teatri “Miotto” di Spilimberc e rive une altre novitât: il gnûf romanç de furlane Ilaria Tuti, “Risplendo non brucio”, une storie dal 1944, de Gjermanie fint a Triest. Ai 22 a Daçan, dialic ator dal saç di Luca Romano in difese de energjie atomiche. A Novembar chei altris apontaments a Brugnere, Cjasarse, Cordenons, Manià e S. Quarin. (A.I.) – 30.09.2024