Teatron di Udin: ve i biliets pai prins spetacui

A tachin miercus ai 2 lis primis prevenditis pai spetacui e concierts de gnove stagjon dal Teatri gnûf “Giovanni da Udine”. De musiche sinfoniche ae comedie, fint aes lezions di storie e chês gnovis di siencis, a saran 12 i apontaments che par chei al è za pussibil cuistâ i biliets, sedi li dai sportei di vie Trento 4 a Udin che di cjase, in rêt, sul portâl Vivaticket. Simpri ative, cun di plui, la tarife agjevolade risiervade ai zovins sot dai 26 agns, che a podaran contâ come simpri sul 50 par cent di scont su dut il presit dal biliet pai spetacui di prose, musiche, opare, oparete e balet. I prins biliets in vendite a son chei dai prins doi apontaments dal cartelon di musiche firmât dal diretôr artistic Paolo Cascio, a scomençâ dal conciert di scree di sabide ai 12 di Otubar fat de Orchestre dai zovins “Luigi Cherubini”, che e celebre i vincj agns di ativitât, direte pe ocasion di Charles Dutoit. Ai 14 di Novembar al rive Sir Antonio Pappano, clamât ae vuide de Chamber Orchestra of Europe cun Bertrand Chamayou al piano. (A.I.) – 01.10.2024