A Gurize une cunvigne su la orloiarie pesarine

In Cjargne, a Pesariis, tal 1725 al è nassût il stabiliment plui innomenât dai orlois in Friûl e no dome: chel dai Fradis Solari, che dai prins dal Nûfcent al tache a puartâ i siei prodots ancje tes Americhis, cuntun disvilup culturâl e economic dal teritori e bondance par dut il borc. A cheste ativitât e je dedicade une cunvigne transfrontaliere di studis “La orloiarie storiche te Mitteleurope dal Siet al Votcent a Pesariis e Gurize”, inmaneade de associazion Amici dell’Orologeria Pesarina Giovanni Battista e Remigio Solari, che si davuelzarà vinars ai 4 di Otubar a Gurize, tal centri universitari di Santa Chiara, in colaborazion cu la Universitât dal Friûl. La cunvigne e je dentri dal progjet “Pesariis, Gurize: testemoneancis di operositât e travuarts di ecelence te orloiarie europeane”. La zornade di studis, un laboratori pal avignî che si propon di tutelâ la ricjece e la diversitât des culturis in Europe, in spiete di GO!2025, e à propit il fin di valorizâ lis carateristichis culturâls comuns dai popui europeans. E di promovi la culture dal disvilup a tiermin lunc dai teritoris. A Gurize si viodarà cualchi documentari su la storie dai orlois di Pesariis dongje di altris intervents, fevelant de orloiarie pesarine dentri di chê europeane, pensant soredut ai zovins. (A.I.) – 03.10.2024