La Vuardie di finance e à fat controi intune schirie di bars, ristorants e cantîrs a Triest e a Duìn, cjatant 60 lavoradôrs iregolârs, di chescj 44 a jerin dal dut in neri. Pardabon pesant il cont di paiâ, parcè che si fevele di passe 235 mil euros di sanzions.
Il personâl controlât al lavorave par 20 diferents datôrs di lavôr. I agjents, soredut dilunc l’Istât, a vevin rinfuarcît i controi tai bars e intai ristorants intes zonis dal centri di Triest e intai Comuns dongje, soredut Duìn, ma cetancj controi a son stâts fats ancje intai cantîrs, ancje tal centri de citât.
Une vore di lavoradôrs, sedi talians, sedi forescj, a jerin dal dut a vore in neri e a vignivin paiâts in contants. Cuintri di 16 impresis, la Vuardie di finance e à mandât al ispetorât dal lavôr une propueste di sospension de ativitât par vê doprât personâl no regolâr par plui dal 10% di chel a buste paie in maniere regolâr. (a.d.g.) – 03.10.2024
