Glesie di Udin in corot pe muart di pre Luciano Segatto

Al è muart vie pe sere dai 3 di Otubar pre Luciano Segatto, predi salesian e figure impuartante pal mont de educazion a Udin. Nassût tal 1947 a San Dona’ di Piave, pre Luciano al varès fat 77 agns ai 20 di Otubar prossim. Ordenât predi tal 1979, al è rivât in Friûl trê agns dopo par fâ il plevan di Gjalarian. Dal 1990 al devente diretôr e daspò president dal istitût Tomadini, vuê convit universitari.

Pre Luciano al fo ancje colaboradôr de Curie e aministradôr parochiâl in tantis glesiis di Udin. La sô dedizion tal setôr de educazion e pastorâl e à lassât un segn di no podê scancelâ, soredut tra i zovins che al à vuidât e judât.