La mascare furlane de comedie antighe

Martars ai 8, aes 6.30 dopomisdì intal foyer dal Teatri gnûf “Giovanni da Udine”, e rive “I travagli d’amore” (I travais dal amôr), leture seniche de comedie scrite dal nodâr di Tisane Marc’Antonio Gattinon, publicade intal 1622. Il volum al sarà presentât di Paolo Patui. L’avigniment a jentrade gratuite al fâs part dai apontaments colaterâi de stagjon 2024-25 dal Teatri Stabil Furlan. No sarà dut câs une presentazion compagne di chês altris: intune cun Patui, al intervignarà ancje il regjist PierPaolo Sovran, che al presentarà i atôrs Claudio Moretti, che al darà vôs ae mascare furlane Malacarne, e po dopo Aldo Sassi, Giuliano Bonanni e Flavia Valoppi. Il progjet al ripuarte in lûs la comedie antighe che, inte storie de leterature furlane, e à rapresentât un câs unic intal so gjenar: un test plurilengâl là che i personaçs a fevelin par furlan, venezian, buranês, toscan, bergamasc, bolognês e “pedantesc”, une sorte di latin strupiât. (A.I.) – 07.10.2024