Si vierzaran miercus ai 9 di Otubar lis prevenditis par un dai avigniments plui spietâts de stagjon 2024/25 dal Teatri gnûf “Giovanni da Udine”: Roberto Bolle and Friends, in program ai 16 e ai 17 di Novembar. Protagonist al sarà un di chei plui innomenâts e amâts balarins tal mont, Roberto Bolle, che pe sô straordenarie gale al sarà compagnât di balarins di innomine internazionâl, che a vegnin des miôr compagniis di balet mondiâls. Elegance, finece, espressivitât a son la cifre stilistiche di chest spetacul straordenari, incentrât su la figure carismatiche dal so creadôr, che al torne a Udin cun gnovis coreografiis e gnûfs balarins soliscj daspò des dôs seradis dal an passât, cun ducj i puescj dal teatri vendûts in pocjis oris. I biliets pes dôs datis – fatis cu la poie de Danieli Group Spa, a saran in vendite tacant des 9:30 di miercus ai 9 su la plateforme Ticketone e ancje li de bilietarie dal Teatri. (A.I.) – 08.10.2024
Foto di V. Lorusso
