Il museu di Tumieç al devente un cjasâl

In ocasion de edizion 2024 de manifestazion “Il filo dei sapori” (“Il Fîl dai Savôrs”), par cure de Comunitât di Mont de Cjargne, tal Museu Cjargnel des arts popolârs “Michele Gortani” di Tumieç al torne “Porca vacca… quanti siamo!”, il percors dedicât ae scuvierte dai animâi dal cjasâl, par frutis e fruts. Sabide ai 12 e domenie ai 13, des 10 di matine aes 5 di dopomisdì, il Museu si trasformarà intun cjasâl “a cîl viert”, dulà che i plui piçui a podaran imparâ a cognossi il mont dai animâi e riscuvierzi lis tradizions, lis usancis e i ogjets dal passât. Al centri di dut al sarà un percors interatîf, che al cjaparà ducj i cinc sens e al varà tant che protagoniscj i cinc animâi simbul dal cjasâl: la vacje, la piore, la gjaline, il purcit e il mus. A ognidun di chei e sarà dedicade une postazion, preparade intai spazis esternis dal Museu. (A.I.) – 10.10.2024