Une rassegne di cines par Basaglia

In ocasion dal centenari de nassite di Franco Basaglia, Cinemazero e “Pordenone Docs Fest – Lis Vôs dal documentari” a inmanein une rassegne cinematografiche itinerante dedicade al psichiatri e neurolic talian: “Basaglia 100”, bon di testemoneâ la atualitât assolude dal so pinsîr e de sô azion sociâl. Dîs lis proiezions in program e tancj i ospits par rifleti su la ereditât di Basaglia. Il documentari “e tu slegalo” di Maurizio Sciarra al vierç la rassegne vinars ai 11 li dal Visionario di Udin e tal Cinemazero di Pordenon. Il secont apontament al è “50 anni di CLU”, che al fevele de prime cooperative sociâl dal mont, nassude propit a Triest. (A.I.) – 10.10.2024