Ilaria Tuti e presente il gnûf libri a “cjase sô”

L’Assessorât ae Culture dal Comun di Glemone al presente un gnûf apontament de rassegne “Di pagina in pagina” (Di une pagjine in chê altre), incuintris in biblioteche cui autôrs ideâts par valorizâ la ativitât di promozion de leture fate de biblioteche civiche Glemonense. Miercus ai 16 aes 8.30 sot sere, in maniere ecezionâl li dal Cine Teatri “Sociale”, Ilaria Tuti e presentarà in dialic cun Marta Rizzi il so ultin romanç “Risplendo non brucio”, jessût fûr par Longanesi. Une des autoris plui preseadis dal panorame leterari contemporani, nassude e cressude propit a Glemone, Ilaria Tuti e torne cuntun romanç storic inmagant che si davuelç dilunc dai ultins agns de Seconde Vuere Mondiâl. (A.I.) – 14.10.2024