“I Turcs tal Friûl” al torne in sene a Udin cu la gnove produzion dal Teatri Stabil Furlan e de Corâl dal Friûl-Vignesie Julie, cu la colaborazion dal CIRF – Centri interdipartimentâl pal svilup de lenghe e de culture furlane “Josef Marchet”. Il test teatrâl furlan al è un dai plui cognossûts fûr dal confins de Patrie: scrit di Pier Paolo Pasolini cuant che al jere zovin, e publicât dopo de sô muart, al sarà metût in sene tal Teatri Palamostre martars ai 15 di Otubar aes 8.30 sot sere. La ocasion e je une vore speciâl: “Pe prime volte, dopo de esecuzion dal 1976 – al spieghe Massimo Somaglino, diretôr artistic dal TSF – a tornin te dramaturgjie lis musichis di Luigi Nono, che a jerin stadis pensadis e scritis propit par cheste opare”. Une scriture, chê di Nono, ricostruide di Daniele Zanettovich daûr dai aponts dal compositôr e des regjistrazions audio, pal fat che lis musichis a jerin ladis pierdudis tal fûc dal Teatri “La fenice” tal 1996. “I Turcs tal Friúl”, che al à debutât a Vignesie tal 1976, un an dopo de muart dal poete, cuant che il Friûl al jere stât sdrumât di pôc dal taramot, cu la regjie di Rodolfo Castiglione e la senografie di Luciano Ceschia. E reste une opare simpri atuâl”. (A.I.) – 14.10.2024
Foto di G. Comoretto
