Presentât îr a Spilimberc tal Mulino di Mezzo de Pro Casarsa della Delizia Aps, adun cul architet Veronica Rossi, il gnûf portâl web turistic “Paîs di Rustic Amour – Sistemi integrati di cooperazione territoriale per uno sviluppo locale sostenibile ed inclusivo”, fat in graciis dai finanziaments dal Program di disvilup rurâl de Regjon Friûl-Vignesie Julie.
Il progjet al cjape dentri i Comuns di Spilimberc (cjâf di grup), Cjasarse, Cjons, Cordovât, S. Zorç da la Richinvelde, S. Martin dal Tiliment, S. Vît dal Tiliment, Siest e Voleson Darzin.
Antonio Tesolin, president de Pro Casarsa, al à ancje presentât cun Christian Costantini, simpri de Pro loco, la app pal telefonin leade al sît che al mostre i 196 chilometris di pistis ciclabilis in cinc itinerariis e cun 272 ponts di interès. “Il progjet nol è dome virtuâl – e à visât l’architet Rossi – parcè che a son stâts metûts a puest ducj i trois otignûts colegant lis stradutis blancjis, indulà che a son stâts metûts cartei che a àn il qr code che al permet di colegâsi al portâl par judâ il turist”.
A jerin presints ancje il sindic di Spilimberc Enrico Sarcinelli e il so assessôr ae Urbanistiche Armando Spagnolo, che al à visât che in graciis dal Psr a son stâts invistûts un milion e 80 mil euros par meti a puest la aree esterne dal Molino di Mezzo. (a.d.g.) – 14.10.2024
