Il traspuart public locâl pront a assumi 80 lavoradôrs

Ai 11 di Novembar e je stade inmaneade une zornade dedicade aes assunzions intal setôr dal traspuart public locâl. In chest setôr si sint une vore la mancjance di autiscj, e no dome inte nestre regjon, ma ancje in dute Europe. “Intai ultins 5 agns – e à visât l’assessôr al Lavôr Alessia Rosolen ae presentazion de zornade, fate vuê a Triest – o vin dât passe doi milions di euros di contribûts par otignî la patente Cqc, formant cussì dal 2019 ai 2023 743 autiscj”.

A son 80 i puescj vierts intes cuatri aziendis che a lavorin inte nestre regjon: si cirin autiscj e mecanics. I colocuis si fasaran tal palaç de Regjon in place Unità d’Italia a Triest. (a.d.g.) – 14.10.2024