A Pordenon la musiche e jentre intes aziendis

Gnove iniziative di Polinote, che al propon une schirie di concierts e laboratoris intai mês di Otubar e Novembar, dentri di realtâts produtivis di Pordenon. A son avigniments origjinâi e che no disfrutin dome la ambientazion tant che senografie, ma a vegnin progjetâts intune cu la realtât che ju ospite. Il “Polinote Music (in) Factory”, diret dal jazzist Francesco Bearzatti, al contribuìs a coltivâ une vere e proprie “culture de colaborazion” jenfri il mont produtîf tradizionâl e la creativitât, no plui relegade a cualchi ocasion di incuintri ogni tant. Si tache miercus ai 16 aes 6 dopomisdì li di Valcucine in vie Savio cun “Paesaggi integrati” (Paisaçs integrâts), il spetacul dal artist sonôr e multimediâl Simone Sims Longo, che il dì dopo al tignarà un cors su lis ultimis frontieris de musiche eletroniche inte cjase dal student. (A.I.) – 15.10.2024