Visavì, la danze te citât cence confin

Tal mês di Otubar, la danze contemporanie e je protagoniste di cinc agns a Gurize cul festival “Visavì Gorizia Dance Festival”, inmaneât di Walter Mramor par ArtistiAssociati. Dai 16 ai 20 di Otubar, te citât cence confin a saran passe vincj events: spetacui – ideâts ancje a pueste pal lûc -, laboratoris, un concors, cualchi ‘prime’ nazionâl taliane. Dut il festival si davuelç di une bande e di chê altre dal confin che nol è plui, a Gurize e a Gnove Gurize, e l’aspiet transfrontalîr, za a tacâ de prime edizion, al à puartât il festival dentri dai events di GO!2025. In collaborazion cul SNG di Gnove Gurize al è vignût fûr un program svariât, che al da cetant spazi ai zovins – sedi balarins che coreografs. Ancje Cormons e Gardiscje a daran acet a cualchi spetacul speciâl, soredut chei “site specific”, ven a stâi nassûts pensant propit al lûc. La scree miercus ai 16 cuntun spetacul pai fruts e po dopo la prime di “Premiere work” de cubie Panzetti/Ticconi e chê (pal teritori sloven) di “Pupo” di Sonia Nappi. Domenie ai 20 si siere cu la gare di danze par talians e forescj, cun musiche dal vîf, inmaneade de compagnie Bellanda. (A.I.) – 15.10.2024