“Giovanni da Udine”: lavôrs par un milion di euros

Il Teatri gnûf “Giovanni da Udine”, di passe 25 agns il centri de culture udinese e regjonâl, al sarà interessât di lavôrs impuartants di inmodernament che a costaran passe un milion di euros. I intervents previodûts sul edifici di proprietât dal Comun di Udin a son in dut cuatri: la ristruturazion de aree bar e dal foyer, i lavôrs pe creazion di un “Ridot”, la riorganizazion dal spazi dai uficis aministratîfs e la instalazion di un implant fotovoltaic sul cuviert dal edifici. “Lis oparis che o vin aprovât – al comente l’assessôr ae Culture, Federico Pirone – no dome a vuelin puartâ il nestri teatri al nivel dai miôr standard europeans pe sostignibilitât energjetiche dai edificis publics, ma soredut a pontin a trasformâlu intun lûc di culture di vivi cun plui servizis cuntune ufierte plui largje e une programazion plui ample e diversificade”. (A.I.) – 16.10.2024