Serade speciâl par Zigaina cun doi videos

Serade speciâl dedicade a Giuseppe Zigaina, joibe ai 17 aes 6 dopomisdì intal Centri studis “Pasolini” di Cjasarse, inte suaze de rassegne “Zigaina 100”, lis celebrazions pal centenari dal pitôr furlan, cuntune anteprime assolude. Dôs lis proiezions in program. Il documentari “Zigaina. La mia idea del dipingere” (Zigaina. La mê idee dal piturâ), cu la regjie di Francesco Bortulini: un ritrat inedit dal pitôr che al à par senari la sô cjase di Çarvignan, il studi dulà che al à piturât e al à scrit. Il cine al è restât no finît dal 2001, cuant che a son stadis fatis lis ripresis, e dome daspò di variis vicendis al à viodût la lûs chest an. Po dopo, la anteprime assolude di “1953: Prin di Mai a Çarvignan”, un filmât curt neorealist realizât di Zigaina intai agns dal penç impegn civîl e politic, restaurât di pôc di Cinemazero e de Cineteche dal Friûl. La dople proiezion e sarà presentade ancje ai 23 di Otubar intal teatri Arrigoni di S. Vît dal Tiliment, ai 24 a Udin tal Visionario, ai 25 a Pordenon li dal Cinemazero e ai 16 di Novembar a Glemone, tal cine teatri “Sociale”. (A.I.) – 16.10.2024