Aquilee: dai sgjâfs il marcjât plui grant dal Imperi

Une scuadre de Universitât di Verone e à di pôcs dîs sierât une gnove campagne di sgjâf inte aree dal Fonts ex Pasqualis, te estremitât sudorientâl di Aquilee. Lis investigazions a son ladis indenant par trê mês e a àn cjapât dentri une ventine di students e zovins dotôrs di ricercje dal ateneu veronês, permetint cussì di investigâ plui di 700 m² di teren mai sgjavât prime e di otignî gnûfs dâts impuartants pe storie dal sît e di dute la citât. Chest an il sgjâf al è in efiets rivât ai nivei plui antîcs di paviments fin cumò evidenziâts intal teren, databii al prin secul p.d.C. e che a podaressin jessi part de prime banchine di spuinde setentrionâl di un flum Natisse ben plui larc di chel di vuê. Par cetant che al tocje il grant marcjât emerzût intal cors dai lavôrs dal 2024, al è vignût ae lûs un cuint lastri a ovest di chei altris. I dâts a confermin la rilevance storiche straordenarie di une aree che no à confronts intal Imperi, atestant la grande vitalitât tant che centri di scambis e cumierçs di Aquilee intal cuart e cuint secul p.d.C. (A.I.) – 17.10.2024