Ultimis datis pal spetacul su la memorie dal “Gortani”

Ultime ocasion par viodi “Cence Memorie”, il spetacul teatrâl itinerant a firme di Carlo Tolazzi e Massimo Somaglino, fat dal Museu cjargnel des arts popolârs “Michele Gortani” in coproduzion cul Teatri Stabil Furlan, cul contribût de Regjon, de Comunitât de Mont de Cjargne e la colaborazion de Filologjiche. Nassût par favorî la riscuvierte dal straordenari patrimoni etnografic cjargnel e par animâ i spazis dal museu in clâf contemporanie, contant la storie dal teritori traviers la contaminazion dai lengaçs artistics, “Cence Memorie” al à striât il public in cetantis ocasions tacant de Sierade dal 2023. Lis ultimis recitis a son in program vinars ai 18 e sabide ai 19, aes 6 dopomisdì e aes 7.30 e 9 sot sere: prenotazions al numar 0433-43233. (A.I.) – 17.10.2024