A Cjampfuarmit si celebre la firme di Napoleon

Cu la manifestazion “Un dì cun Napoleon”, inmaneade de associazion Amîs dal Tratât, Cjampfuarmit si prepare a memoreâ un dai avigniments plui significatîfs de storie europeane: la firme dal Tratât di “Campoformio” sucedude intal Otubar 1797. L’apontament anuâl cheste volte al è sabide ai 19 e al ufrirà une ocasion uniche par imerzisi intal passât e vivi in prime persone la storie, in graciis di une serie di ativitât par ducj e par dutis lis etâts. De matine, la citât si animarà cuntun program plen di iniziativis: bancuts di anticuariât, tocs unics leâts al mont napoleonic e ae storie in gjenerâl. Des 9, visitis vuidadis li de Cjase dal Tratât, po dopo lezions didatichis curadis de Associazion Napoleoniche Taliane, zîrs in caroce storiche, la celebrazion uficiâl dal aniversari de firme, aes 11.30 di matine, inte Arene di place dal Tratât. Tal dopomisdì, altris apontaments, conferencis, corteus, concierts e ancje une cene cun plats ‘storics’ . (A.I.) – 18.10.2024