I catalans “Remei de Ca la Fresca” a àn vinçût la decime edizion di Suns Europe, il festival des arts in lenghe minorizade organizât de cooperative Informazion Furlane, editore di Radio Onde Furlane – cu la poie de Regjon, de ARLeF – Agjenzie regjonâl pe lenghe furlanis, dal Comun di Udin e de Fondazion Friuli. Carismatics e parons dal palc, ancje se cetant zovins, a àn concuistât la jurie tecniche internazionâl. Il public dal Teatron al à sielt invezit regjine de serade la furlane Nicole Coceancig (rivade seconde pe jurie tecniche), che pôcs dîs indaûr, cu la stesse cjançon presentade a Suns Europe, e veve vinçût la vincjesime setime edizion dal Premi “Ciampi”: la prime volte inte storie par une cjançon in lenghe minorizade. A jê al è stât assegnât il premi dedicât a Guglielmo Tonelli. Il tierç premi, “Altre Europe”, al è stât assegnât invezit al portâl eurominority.eu, un pont di riferiment par ducj chei che a vuelin cognossi la situazion linguistiche, culturâl e politiche des comunitâts minorizadis de Europe, consegnât al so fondadôr, il breton Mikael Bodlore-Penlaez. (A.I.) – 21.10.2024
Foto di L. Chiandoni
