La stagjon di prose dal Teatri gnûf “Giovanni da Udine” firmade di Roberto Valerio si vierç martars ai 22 cun Umberto Orsini e Franco Branciaroli, protagoniscj de comedie di ridi “I ragazzi irresistibili” (I fantats iresistibii) di Neil Simon, cu la regjie di Massimo Popolizio. Une autentiche opare mestre teatrâl, in program fint a joibe ai 24, che e je daûr a vê un sucès grandonon di public in ducj i palcs di Italie. E che e je la storie di doi atôrs anzians di varietât che a àn lavorât in cubie par dute la vite, clamâts a tornâ adun daspò di undis agns de lôr separazion. La ocasion e ven di une trasmission televisive che ju vûl insiemi, dome par une sere, par celebrâ la storie dal varietât. Prime dal spetacul, aes 5.30 di dopomisdì, al è in program un incuintri cun Peter Brown, diretôr de British School dal F-Vj, par un aprofondiment su temis e curiositâts dal test scrit dal dramaturc american, autôr ancje di altris comediis di cult. Ae stesse ore, miercus ai 23, Orsini e Branciaroli a cjataran il public li de “Casa Teatro”. (A.I.) – 21.10.2024
Foto di N. Feletti
