Un documentari par trê vueririis furlanis dal Nûfcent

Trê feminis compagnis di cetantis altris, ma che intal moment plui dificil de lôr vite a àn sielt di lotâ pe pâs e pe libertât. Trê esemplis di cûr e di impegn civîl. Trê “vueririis” dal Nûfcent che no si son mai cjatadis, e che cumò a dialogaran in graciis des tecnologjiis modernis. Si intitule propit “Guerriere” (Vueririis), il gnûf progjet di SimulArte, che in chest mût e met intun lis vitis di trê grandis feminis de storie dal Friûl e di dute Italie: Cecilia Deganutti, Bruna Sibille-Sizia e Paola Dal Din, la uniche ancjemò in vite. Intun curtmetraç pe regjie di Marco Fabbro, lis vôs des trê “vueririis” impersonadis di trê atoris zovinis, Caterina Bernardi, Letizia Buchini, Giulia Cosolo, si fondaran intune esperience uniche e imersive, proponude dai 23 ai 27 di Otubar a Udin, inte Sale Florio di Palaç Florio, e po dopo a Tavagnà, Paulêt, Buie e Reane dal Roiâl, ducj lûcs che a àn vivût la Resistence. Il documentari, che al dure 20 minûts, al vignarà proietât ogni zornade a jentrade gratuite in diviersis replichis su prenotazion. Informazions su: biglietteria@simularte.it. (A.I.) – 22.10.2024