Arestât dai agjents de scuadre mobile de Polizie di Stât di Udin un om talian di 43 agns, fraudadôr che al veve cirût di comprâ robe mostrant documents di identitât e une buste paie fals.
Il fat al è sucedût vinars passât ai 18 di Otubar cuant che i agjents a àn viodût doi oms dentri di une auto che a lavin ator controlant in maniere suspiete lis buteghis.
In vie Caccia il passizîr al è smontât ju’ de auto e al è jentrât intune buteghe di bicicletis di indulà che al è jessût uns cuindis minûts plui tart.
In chê ocasion i poliziots a àn decidût di identificâ i doi: il passizîr ur à contât che al voleve comprâ une bici che e costave 4.500 euros paiant a ratis, ma che il finanziament nol jere lât ben, mostrant une copie de domande ae finanziarie e une cjarte di identitât che e jere falade e intestade a une persone che no esisteve.
Dai controi al è saltât fûr che l’om al faseve di solit chestis fraudis e i àn cjatât intor ancje un telefonin gnûf comprât cul stes metodi il di’ prime a Trevîs e par chest al è stât blocât.
Inte convalide dal arest il Gip al à ordenât la misure cautelâr de improibizion di fermâsi in ducj i Comuns de provincie di Udin, intant che il Cuestôr al à fat pal om il sfuei di vie obligatori cu la improibizion di tornâ a Udin par trê agns. (a.d.g.) – 22.10.2024
