La SAF e conte la sô storie e lis monts intune mostre

Une mostre che e conte “la mont furlane”, une riflession suntun lûc che al à dât vite vie pal timp a une civiltât origjinâl, cetant plene di aspiets culturâi, sociâi, economics e ambientâi che a son unics. Cheste e je “La conoscenza dei nostri monti” (La cognossince des nestris monts), pai 150 agns de SAF, Societât Alpine Furlane, la esposizion che e sarà screade joibe ai 24 aes 6 di dopomisdì intal Salon dal Parlament dal Cjistiel di Udin e che e sarà vierte al public di vinars ai 25 di Otubar e fint ai 11 di Zenâr dal 2025. Storie, esplorazion, alpinisim e etnografie, cambiaments climatics e prospetivis futuris: dut chest si viodarà intai doi plans dai museus civics dal Cjistiel, dulà che e je ospitade la mostre, promovude e organizade de Societât Alpine Furlane in ocasion des celebrazions pai 150 agns de fondazion. Il percors espositîf al propon vogladis e leturis pussibilis des monts di vuê e di îr. In dôs salis dal Museu de Fotografie al cjate spazi il patrimoni storic e iconografic de SAF, in part lassât ai museus civics, in part risultât di prestits de bande di istituzions e di privâts, e fin cumò mai fats viodi dal dut. (A.I.) – 23.10.2024