Visite al cimitieri dai erois di Aquilee

Rivât ae setime edizion, il progjet “#Storytellersww1”, gjestît de Pro Loco di Foian Redipulie, al conte la ricostruzion daspò de vuere cun “The way out: (ri)costruzione”. La idee e vûl partî de narazion de Vuere grande par lâ indevant intai agns ’20 dal Nûfcent, cuant che il teritori regjonâl al veve scomençât lis grandis oparis di ricostruzion e la gnove costruzion. Une (ri)costruzion no dome fisiche, ma ancje dal tiessût sociâl e economic che si è cjatât a vê di creâ une gnove vision di se stes. Il fin al è chel di contâ la Storie e ancje lis piçulis storiis dal nestri teritori, de sô int. Joibe ai 24 si davuelzarà une cjaminade storiche cun visite al cimitieri dai erois di Aquilee aes 4.30 dopomisdì cul espert Silvo Stok e po dopo une visite ae mostre “Totale”, ven a stâi “la Vuere grande traviers la storie di oms e feminis”. (A.I.) – 23.10.2024