Inviât il plan di emergjence dopo dal fûc che si è impiât vuê di buinore intun capanon vueit inte zone industriâl di Cjiscjerne di Cosean. Cuant che a son rivâts, di fat, i Vigjii dal fûc a àn cjatât une sostance che e podarès jessi incuinante, juste sot de vascje di ciment armât li che dentri a jerin pneumatics masanâts che, par cause de combustion, a àn produsût fum che si podeve viodi di une vore di lontan.
Par chest sul puest al è rivât di Triest il nucli Nbcr dai Vigjii dal fûc pes analisis e a son stâts visâts prefet di Udin, Arpa e carabinîrs.
Il plan di emergjence, in spiete di savê la origjin de sostance, al previôt che la popolazion, intun rai di 500 metris dal fûc, e sedi visade dai pericui pussibii pe salût.
Il sindic di Cosean Davide Asquini al à dut câs confuartat: “Nol è nissun pericul iminent”. (a.d.g.) – 23.10.2024
