Une cunvigne pai 50 agns de associazion Mitteleurope

La associazion Mitteleurope, nassude ai 26 di Otubar dal 1974, e fâs cincuante agns e ju celebre cun doi dîs di avigniments a Udin e Aquilee, par ripassâ la storie di “Un sium cence confins”: une vere mission politiche, istituzionâl e culturâl par creâ puints e butâ jù i confins al centri de Europe, in graciis de cooperazion e des relazions internazionâls de bande di chê che e je deventade une vere e proprie agjenzie diplomatiche privade. Lis celebrazions a cjapin dentri ancje la vincjesime edizion dal Forum Internazionâl de Euroregjon Aquileiese. Si tache la matine di vinars ai 25 di Otubar intal Palaç Antonini Maseri de Universitât dai studis di Udin, e il dopomisdì ducj a Aquilee. Sabide ai 26 il Forum al continue inte sede de Fondazion Friûl in Palaç Antonini-Stringher a Udin e si proiete bande il futûr des relazions diplomatichis e de cooperazion in Europe. Intant, e reste vierte fint ai 4 di Novembar la mostre preparade dentri de Biblioteche statâl di Gurize, che e ripasse la storie de Associazion e, tal stes timp, chê de regjon e de Europe.  (A.I.) – 24.10.2024