Luzzatto a Udin par ritirâ il premi “Friuli Storia”

Al sarà un dialic apassionant, leât a un passaç culminatîf de storie de Republiche, l’avigniment che al siere la decime prime edizion dal premi “Friuli Storia”, intitulât “Brigate Rosse. Sangue sulla Repubblica” (Brigadis Rossis. Sanc su la Republiche). Sabide ai 26 aes 6 dopomisdì intal Auditorium dal Centri culturâl Delle Grazie in vie Praclûs, la cerimonie di consegne al vincidôr: il storic Sergio Luzzatto, autôr dal volum “Dolore e furore. Una storia delle Brigate Rosse” (Dolôr e furôr. Une storie des Brigadis Rossis, jessût par Einaudi). Cul vincidôr al dialogarà Michele Brambilla, daspò de presentazion de bande dal president di Friuli Storia, Ernesto Galli della Loggia. Ae cerimonie a intervignaran ancje chei altris finaliscj, Michele Todero e Filippo Triola. Il premi “Fruli Storia” al è l’unic in Italie pe sagjistiche assegnât in maniere direte di une jurie di ben 403 letôrs. (A.I.) – 25.10.2024