Ultins dîs par partecipâ al premi leterari di Tisane

La scjadince par partecipâ ae trentesime seconde edizion dal prestigjôs premi leterari internazionâl “Latisana per il Nord-Est” e je dongje: ai 31 di Otubar dal 2024 aes 6.30 dopomisdi’ al è il tiermin par inviâ lis candidaturis (informazions in rêt a: premioletterariolatisana@comune.latisana.ud.it). Il concors, promovût dal Comun di Tisane, al è viert a autôrs di nassite o residents in Friûl-Vignesie Julie, Trentin-Sud Tirôl, Venit e ancje in Austrie, Cravuazie e Slovenie, o a cualsisedi che al vedi ambientât lis propriis oparis in chescj teritoris. Al è risiervât a tescj di narative publicâts daspò dal prin di Setembar dal 2023, in volum di cjarte; lis oparis a àn di jessi autonomis, si che duncje no saran acetadis racueltis di contis di plui autôrs o oparis publicadis in rêt o di bessôi. Di là de jurie tecniche, componude di critics leteraris e scritôrs di rilêf, il premi al previôt ancje la partecipazion di une jurie dai letôrs e di une dai fantats. (A.I.) – 28.10.2024