Li de Cjase Rosse di Gurize un altri grup internazionâl

Al è stât pandût un altri grant apontament musicâl che al animarà il cartelon di avigniments di “GO!2025”, la rassegne ideade e promovude de Regjon Friûl-Vignesie Julie in ocasion de Capitâl europeane de culture. I Thirty Seconds To Mars dal cjantant e atôr Jared Leto a saran in conciert ai 3 di Lui, li de Cjase Rosse Arene di Gurize. Dopo il sucès dal ultin album “It’s the end of the world, but it’s a beautiful day” jessût ai 15 di Setembar dal 2023 pe etichete Virgin e il sucès dal tour intes arenis principâls di dut il mont, che in Italie al à jemplât la passade Vierte lis datis di Bologne e di Turin, i Thirty Seconds to Mars a tornin il prossim Istât intes rassegnis principâls de Europe. La uniche date a Nordest e je propit chê furlane. (A.I.) – 28.10.2024