Ducj i vincidôrs dal Premi “Luchetta”

I fruts ucrains e palestinês che a puartaran par simpri i segns de vuere sul cuarp e inte psiche. Lis telefonadis dramatichis cun domandis di intervent ae sale operative de Mieze Lune rosse de Palestine. La fam disperade di miârs di personis inte zone dal Tigrè in Etiopie. A son dome un pâr dai temis dai servizis vincidôrs dal Premi gjornalistic internazionâl “Marco Luchetta”, dedicât ae troupe Rai sassinade di une bombe a Mostar, vie per vuere dai Balcans, intal 1994, intant che al faseve un servizi sui fruts cence non. Di là di Luchetta, a muririn Alessandro Saša Ota e Dario D’Angelo. Dal 15 ai 17 di Novembar, Triest al torne la capitâl dal gjornalisim che si interoghe sui conflits che a incendiin la Europe e il Medi Orient, su la cuistion des rotis migratoriis e su la privazion dai dirits. I vincidôrs a son Raffaella Cosentino pe sezion TV News; Alice Facchini e Iris Biasio par chê de “Stampe Taliane”; Francesca Mannocchi pal Reportage; Annalisa Camilli inte sezion “Rote Balcaniche”; Azzurra Meringolo Scarfoglio pe Radiofonie; Gabriella Jozwiak pe Stampe Internazionâl e RFE al è il vincidôr de sezion Fotografie. Il Premi speciâl al va al coletîf +972 Riviste pes sôs analisis sui avigniments in Israêl e in Palestine. (A.I.) – 29.10.2024