Un arlevament di dindis al è stât tacât dal virus de aviarie a S. Zorç di Noiâr e la Regjon e à daurman inviât la unitât di crisi e dutis lis misuris di sigurece par frenâ l’infet.
Il fûc de infezion al è stât cjatât dal Servizi di prevenzion regjonâl che al à daurman decidût di isolâ il puest. “Prime di dut – al à visat l’assessôr regjonâl ae Salût Riccardo Riccardi – e je stade fate une investigazion epidemiologjiche par controlâ cemût che al è jentrât il virus e par blocâ dutis lis pussibilitâts che al rivi a lâ fûr. Cumò l’arlevament al è dal dut isolât e chei che a lavorin dentri a doprin dispositîfs di protezion par lavorâ in sigurece”.
Lis normis a oblein a copâ ducj i animâi dal arlevament che a son miârs e a smaltîju in sigurece par fâ in mût che l’infet nol ledi indenant. (a.d.g.) – 30.10.2024
