La comunitât di Puçui e à memoreât vie pe matine di miercus ai 30 di Otubar i 107 agns de bataie che e à segnât par simpri la storie no dome dal paîs, ma ancje de Vuere Grande. La cerimonie e à fat onôr al sacrifici dai cavalîrs de seconde brigade di cjavalarie e dai fants de brigade “Bergamo”, che dai 29 ai 30 di Otubar dal 1917 a àn permetût al esercit talian di ritirâsi di là dal Tiliment par preparâsi cussì ae difese.
Lis celebrazions a son tacadis inte sere di martars cul conciert de fanfare de brigade “Pozzuolo del Friuli” li dal istitût agrari e a son ladis indenant miercus cu la deposizion des rosis li dai monuments. “Puçui – al à visât il sindic Gabriele Bressan – al è e al sarà simpri leât ae brigade che e puarte il so non”. (a.d.g.) – 30.10.2024
