E je stade finide la prime part dai lavôrs par disboscâ, che si vevin di fâ vie pe gnot, dilunc de strade regjonâl tra Resiute e Resie. La ordenance dal Edr di Udin che e proviodeve la sierade di gnot de strade e je scjadude domenie passade e no sarà rinovade.
Cundut dal brut timp di Otubar, lis impresis che a vevin di fâ i lavôrs, Piazza Vante e Alpi Srl, adun cu la struture dal Edr, a àn savût gjestî la situazion lant bande des esigjencis de comunitât.
Ducj a àn fat dal lôr miôr par risolvi i problemis, ancje chei di emergjence, come il fat di lassâ passâ un pari che al veve di cori tal ospedâl pe nassite dal so piçul. Cumò a van indenant vie pal di’ i lavôrs par tirâ su’ lis rêts e lis barieris par blocâ i clapons, cu la strade che e sarà vierte a sens unic alternât.
Ducj a sperin che dentri 3 o 4 mês la strade e torni a vierzi dal dut daspò doi agns dal fûc dolôs che al à causât ducj chescj problemis. Il sindic Anna Micelli e à ingraciât ducj, residents, ativitâts economichis e i visitadôrs de Val Resie pe pazience che a àn vût. (a.d.g.) – 12.11.2024
