Premi par Accardo dal teatri di Pordenon

Al è stât assegnât a Salvadôr Accardo, un dai soliscj plui prestigjôs de sene musicâl internazionâl, violinist e diretôr di orchestre di innomine mondiâl, il premi “Pordenone Musica” 2024. Ideât e inmaneât dal Teatri “Verdi” di Pordenon in onôr di cui che al contribuìs al passaç de cognossince e dal amôr pe musiche, l’unic ricognossiment dal gjenar a nivel internazionâl, al è stât istituît dîs agns indaûr e dât a grandis personalitâts de musiche taliane e internazionâl. Prime di vê il premi, Accardo al veve di sunâ vinars ai 15 tal Teatri “Verdi” cu la Orchestra da Camera Italiana formade di cualchidun dai siei miôr arlêfs, che vuê a son deventâts soliscj o primis parts di orchestris internazionâls, ma l’apontament al è stât rimandât parcè che il musicist nol sta masse ben. (A.I.) – 14.11.2024