Al torne il prin film ‘di pôre’ par furlan

“Lidrîs cuadrade di trê”, zirât tal 2000 di Lorenzo Bianchini, senegjatôr e regjist nassût a Udin tal 1968, il prin a ‘fâ pôre’ sul grant schermi par furlan, al torne vinars ai 15 par un ‘cineforum’ te canoniche di Sante Marie di Sclaunic. Inte serade si viodarà ancje un toc, une ‘cerce’, dal ultin lavôr dal regjist, “La memoria del buio”, che al sarà voltât par dîs lenghis diferentis, cui atôrs Paolo Fagiolo e Marco Marchese, la produzion di Artevideo e la distribuzion di Minerva Pictures. Daspò di chel lavôr ‘a bas presit’ (low budget, par inglês), Lorenzo al è lât indevant, in maniere simpri plui professionâl. Tal 2004 al è rivât un altri cine dal orôr, “Custodes bestiae”, zirât a Udin, Aquilee, Vile Manin e tal fuart di Osôf, po dopo “Film sporco” par talian, “Occhi”, “Oltre il guado”, une serie pe rêt clamade “Sidera” e tal 2022 il prin film dal orôr cuntune produzion di pês, “L’angelo dei muri”. Ma chê storie di 97 minûts, zirade tai soteranis dal Istitût “Malignani” di Udin, e je deventade une liende, che e torne fûr par une sere. (A.I.) – 14.11.2024