Condane pesante a 10 agns di preson par un rumen di 39 agns, resident inte Basse furlane, acusât di vê abusât par sîs agns de fie de femine che e viveve cun lui, ven a stâi di cuant che la frute e veve dome 8 agns, une storie che o fasaressin vulintîr a mancul di scrivi. A meti l’orcul inte trapule e je stade une telecjamare platade des fuarcis dal ordin.
Cheste situazion di violence e je lade indenant fintremai cuant che la frute e à fevelât di ce che i stave sucedint a un so insegnant. L’om, che al vîf inte Basse, al è stât filmât dentri cjase sô intant che al faseve violence.
Secont la acuse, i abûs a son tacâts ancjemò cuant che la famee si cjatave in Romanie, intal 2017. Sul principi l’om si limitave a tocjâ la vitime, ma cuant che a son rivâts in Italie, la zovine e à tacât a patî ats sessuâi, simpri cuant che la mari di jê e jere fûr cjase o e durmive.
Deventade adolessente, la frute e à cirût di dâ cuintri al orcul che al voleve comprâle fasintji regâi o dantji bêçs. Cuant che la vitime e à fat 15 agns, e à cjatât biadelore il coragjo di fevelâ di ce che e pative cuntun insegnant. Sintude la storie teribile, il docent al à daurman fevelât dal fat cu la dirigjente de scuele che e à informât subit de situazion lis fuarcis dal ordin.
Pôc timp dopo, dentri de cjase e je stade platade une telecjamare e tal Fevrâr di chest an l’om al è stât filmât intant che al violentave la fantate. Dopo di cheste ultime violence, la vitime e je stade puartade vie de cjase e metude intune struture protete.
“La pene dade al om – a àn dit l’avocat che e difindeve la frute, Consuelo Zanini, e il so curadôr speciâl, l’avocat Giulia Aloisi – e je adeguade a pet de gravitât e de reiterazion di cheste azion”.
L’avocat difensôr dal om condanât, Federica Zambon, e à dit che e valutarà cuale che e sarà cumò la difese miôr pal so assistût. (a.d.g.) – 14.11.2024
58
