Intervent une vore dificil pai pompîrs a Manià, indulà che il fûc al à fiscât dal dut, miercus sore sere, un laboratori artesanâl. Tor des 6 sore sere i Vigjii dal fûc di Pordenon a son rivâts cun trê scuadris, 5 autocistiernis e une autoscjale e il funzionari di vuardie par studâ lis flamis che a vevin cjapât un imobil doprât come laboratori.
Cuant che a son rivâts i pompîrs, magari cussì no il fûc al cjapave za dut il fabricât e al veve tacât a brusâ aromai ancje il cuviert; par chest i vigjii a àn spesseât a butâ aghe, rivant a blocâ il fûc prime che al cjapi chês altris cjasis dongje. Pôc dopo, mandâts dal Comant dai pompîrs di Udin, a son rivâts a dâ une man ancje doi piçui sgjavadôrs, doprâts par tirâ vie la robe brusade.
Lis operazions di distudament a son ladis indenant par dute la gnot. Dome sul cricâ dal dì de joibe, a son finîts i intervents di bonifiche e di metude in sigurece dal puest. A son ancjemò di sclarî lis causis che a àn scjadenât il fûc che, par fortune, nol à cjapade dentri int. Sul puest a son rivâts ancje i carabinîrs. (a.d.g.) – 14.11.2024
