A Pordenon in mostre i cuadris lassâts di Giacomo Ros

Giacomo Ros “al torne” te Cjase dal Student, dulà che al è stât president par trê decenis, dal 1977 al 2007, inte citât – Pordenon – dulà che al è stât sindic par vot agns, dal 1967 al 1975. A visâsi di lui, ripassant la sô passion simpri vive pe art e pe culture, e je la mostre che si scree sabide ai 30 inte Galarie “Sagittaria” di vie Concuardie, dedicade apont al “Lascito Ros”: un satûl di libris, pituris, incisions e sculturis donâts ae Fondazion Concordia Sette, nassude te Cjase Zanussi par conservâ e valorizâ i tancj cuadris, sculturis, fotografiis e oparis su cjarte restâts in graciis de gjenerositât dai artiscj e presentâts in centenârs di esposizions vie pal timp. Promovude dal Centri Iniziativis Culturâls Pordenon e curade di Giancarlo Pauletto, la mostre e cjape dentri une selezion des oparis di art de cjase di Pordenon di Giacomo Ros, o donadis par testament al Centri Zanussi, adun cu la sô biblioteche e la colezion di musiche classiche e oparistiche. Tantis lis firmis impuartantis: Renato Guttuso, August Murer, Mario Donizetti e ancje Giambattista Tiepolo. (A.I.) – 27.11.2024