Agatha Christie a teatri cul miôr drame judiziari

Al rive intal Circuit dal Ert chel che tancj a calcolin il miôr drame judiziari mai scrit. “Testimone d’accusa” (Testemoni di acuse), di Agatha Christie, inte traduzion di Edoardo Erba e cu la regjie di Geppy Gleijeses, al sarà ospit di cuatri palcs regjonâi tacant di joibe ai 28 tal Teatri “Sociale” di Glemone, par lâ indevant vinars ai 29 tal Teatri “Zancanaro” di Sacîl, sabide ai 30 tal Teatri “Italia” di Pontebe e par sierâsi domenie al prin di Dicembar tal Auditorium “Aldo Moro” di Cordenons. Vanessa Gravina, Giulio Corso e Paolo Triestino a son lis stelis di un grup che al conte la storie di un om ordenari, acusât di vê sassinât une siore anziane. Nassût tant che une conte curte intal 1925, po dopo adatât in forme di opare teatrâl tal 1953, al à vût sucès soredut intal adatament cinematografic dal 1957 di Billy Wilder cun Charles Laughton, Marlene Dietrich e Tyrone Power. (A.I.) – 27.11.2024