Ator pe regjon une comedie innomenade di Goldoni

Apontament in diviers lûcs de regjon cuntune comedie scrite di Carlo Goldoni, ma plui atuâl che mai: “Il Giuocatore”. Il classic, ma cu la regjie firmade di Roberto Valerio, al sarà in sene joibe ai 28 tal Teatri Comunâl di Cormons. Dai 29 di Novembar al prin di Dicembar e sarà tal Teatri gnûf “Giovanni da Udine”, dulà che sabide dopomisdì la compagnie e il regjist a cjataran il public par un gnûf apontament di “Casa Teatro”. Il spetacul al sarà po dopo in programazion ai 3 di Dicembar a S. Vît dal Tiliment pal circuit ERT. “Il Giuocatore” e je une des “sedis comediis gnovis” che Goldoni si jere impegnât a scrivi dome intun an, ator de fin dal carnevâl dal 1750, par une sfide cul public venezian. (A.I.) – 27.11.2024

Foto di I. Costanzo