E je une realtât in cressite costante e che e mande fûr tal forest une vore des pomis che e prodûs. O fevelìn de Frutta Friuli, la cooperative plui grande di fruticultôrs dal Friûl-Vignesie Julie, cun 150 iscrits e la sede centrâl a Spilimberc inte zone industriâl Nord e altris lûcs di produzion fintremai a Rossêt. I socis a àn aprovât ae unanimitât il belanç dilunc de assemblee che si è fate intal Vcr Research Center ospitade dai Vivai cooperativi Rauscedo.
E je la tierce assemblee de cooperative nassude tal 2022 cuant che si son metudis adun lis cooperativis Friulfruct e Friulkiwi. Il faturât al è in cressite e al è passât di 15 milions e 800 mil euros a 20 milions e 491 mil euros, cuntune fuarte vendite tal forest. In cressite ancje la ocupazion tant che i lavoradôrs a son dopleâts e a son deventâts cumò 80. A spleâ il belanç al è stât Livio Salvador, president de cooperative. (a.d.g.) – 27.11.2024
