Il Tiliment in mostre a Tumieç

Il CeVI – Centri di Volontariât Internazionâl di Udin e l’Ecomuseu des Aghis dal Glemonat, in colaborazion cul Comun di Tumieç, a inmanein la mostre fotografiche e multimediâl di Eugenio Novajra “Tiliment, il Flum si conte”, tal Palaç Frisacco dai 30 di Novembar ai 15 di Dicembar. L’autôr al presente une narazion fotografiche e video dal tai naturalistic e antropologjic, cu la sielte di doprâ soredut la riprese aerie, la vision a “svol di uciel”, che e pant e e descrîf miôr di chês altris il grant jet dal Tiliment, simpri compagn ma simpri diviers. Une narazion personâl, che e vûl jessi ancje un invît ae narazion coletive di un flum che al è patrimoni di ducj, cul so ambient e la sô biodiversitât che a àn di jessi difindûts e documentâts. (A.I.) – 28.11.2024