Filologjiche in fieste cu lis novitâts editoriâls pai piçui

Di cualchi dì, a son stranis figuris che a zirin ator pes stanziis di Palaç Mantica, la sede di Udin de Societât Filologjiche Furlane: besteutis e spirts dal bosc, spirfolets e fadutis cu lis alis. A son i personaçs des novitâts pe infanzie a pene publicadis, ma za prontis a concuistâ la curiositât dai fruts di dut il Friûl, de Cjargne al Cjanâl dal Fier, di Gurize a Pordenon, cence dismenteâsi dal centri di Udin. A tacâ des 5 daspò misdì di lunis ai 2 di Dicembar, di fat, al è in program “Un dopomisdì di fieste cun Teo, Spitz Parkli e la Fadute di For”, dut dedicât ae presentazion interative di “Buine gnot Teo/Buonanotte Teo/Good night Teo”, di Barbara Jelenkovich e Giovanna Zordan, “Spitz Parkli. Bentornati/Wilkommen zurück/Bentornâts/Welcome back” di Federica Pagnucco, Arianna Donadelli e Sara Beinat, “La Fatina di Forni/La Fadute di For” di Paola Cosolo Marangon e Fabiola Perissutti. Grancj e picinins a podaran scuvierzi lis trê novitâts editoriâls midiant di leturis inmagantis, laboratoris colorâts e zûcs divertents in compagnie des autoris e ilustradoris, il dut acompagnât di une mirinde golose ufierte a ducj i partecipants. L’event al fâs part de rassegne “Nadâl in Filologjiche”, il calendari di incuintris che la Filologjiche e inmanee ae fin dal an. (A.I.) – 02.12.2024