A son cuatri lis personis sot investigazion pe ipotesi di omicidi colpôs pe muart di Cristian Molnar, Bianca Doros e Patrizia Cormos, i trê zovins rumens copâts ai 31 di Mai di chest an de furie dal flum Nadison in plene. La Procure di Udin e à segnât intal regjistri dai indagâts trê Vigjii dal fûc, che a jerin in servizi chel di’ inte sale operative dal Comant di Udin e l’assegnât de Sores che al à cjapât lis telefonadis di alarme e inviât l’intervent dal elicotar.
I cuatri indagâts a podaressin jessi in cualchi maniere cjapâts dentri intai ritarts presumûts che no vevin permetût al elicotar di rivâ in timp di Vignesie par salvâ i zovins blocâts tal flum. I ritarts a podaressin jessisi ingrumâts dilunc de cjadene di comunicazion tra Vigjii dal fûc, Sores e la base dal elicotar.
I pompîrs, doi di chei difindûts dal avocat Stefano Buonocore e un dal avocat Alfonso Mangoni di Salerno, plui l’assegnât de Sores, difindût dal avocat Maurizio Miculan, a son stâts convocâts intai dîs prossims in Procure, indulà che a rispuindaran aes domandis dal procuradôr Massimo Lia e de titulâr dal fassicul, il sostitût procuradôr Letizia Puppa. (a.d.g.) – 02.12.2024
