La ‘femine perfete’, ma di 60 agns indaûr

Isal pussibil cumbinâ famee e lavôr? Cuale ise la miôr maniere par pierdi pês? Cemût si fasial a netâ cjase? Lis rispuestis a chestis domandis si cjatavin in libris, manuâi e rivistis di cualchi an indaûr, i ‘favolôs’ Sessante. Parcè che, se no si nasseve siôrs (e sioris), inte Italie dal miracul economic, si podeve simpri deventâ, lant daûr dai conseis des espertis, dôs vendidoris che a sclarivin cemût vistîsi, imbeletâsi, petenâsi, fevelâ, cjaminâ e fintremai cemût colâ! Al è di chi che al tache il spetacul “Enciclopedia della donna perfetta” (‘Enciclopedie de femine perfete’), dal non di une publicazion de epoche, in sene miercus ai 4 tal Teatri Comunâl di Manià, intune repliche dedicade ai students des scuelis aes 10.30 di buinore. Il spetacul di Evarossella Biolo e Stefania Carlesso al fronte in mût ironic i problemis relatîfs aes discriminazions di gjenar, inte convinzion che ridi e sedi une des clâfs plui buinis par acedi ae ment e al cûr des personis, massime chês plui zovinis. (A.I.) – 03.12.2024